ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (OHS) ᐱᓕᕆᐊᒃᓴᖏᑦ ᑐᕌᒐᖃᒐᔪᒃᑐᑦ ᐱᑕᖃᕈᓐᓃᖅᑎᑦᑎᓂᕐᒥᒃ ᑎᒥᒧᑦ ᐅᓗᕆᐊᓇᕈᓐᓇᖅᑐᓂᒃ ᐊᒻᒪᓗ ᐋᓐᓂᖅᑎᑦᑎᑦᑕᐃᓕᒪᓂᕐᒧᑦ ᐱᕐᕈᓗᐊᕿᑎᑦᑎᑦᑕᐃᓕᒪᓂᕐᒧᓪᓘᓐᓃᑦ ᐃᖅᑲᓇᐃᔭᕐᕕᖕᒥᑦ. ᑭᓯᐊᓂᓕ, ᖃᓄᐃᙱᑦᑎᐊᖁᓪᓗᒋᑦ ᐊᒻᒪᓗ ᐊᑦᑕᕐᓇᙱᑦᑎᐊᕐᓗᑎᒃ ᐃᖅᑲᓇᐃᔭᕐᕖᑦ ᐸᕐᓇᐃᓯᒪᓪᓗᐊᖅᑐᑦ ᑕᒪᕐᒦᖕᓄᑦ ᑎᒥᒧᑦ ᐅᓗᕆᐊᓇᕈᓐᓇᖅᑐᓄᑦ ᐃᖅᑲᓇᐃᔭᖅᑏᑦ ᐊᑐᑐᐃᓐᓇᕆᐊᖃᖅᑕᖏᓐᓄᑦ ᖃᐅᑕᒫᖅᓯᐅᑎᖏᓐᓄᑦ ᐃᖅᑲᓇᐃᔮᖏᓐᓂᑦ, ᐊᒻᒪᓗᑦᑕᐅᖅ ᑲᒪᒋᖕᒥᓗᒋᑦ ᐃᓱᒪᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ.
ᐊᔾᔨᐅᔪᑦ ᐃᓱᒪᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᓱᒫᓘᑕᐅᔪᑦ ᐱᖃᓯᐅᑎᓪᓗᒋᑦ: ᓱᒃᑲᓕᓂᖏᑦ ᓱᒃᑲᐃᓐᓂᖏᑦ ᐊᒻᒪᓗ ᐃᑲᕐᕋᑦ ᐃᖅᑲᓇᐃᔭᕐᓇᑦ, ᑕᖃᓗᐊᕐᓂᖅ, ᓯᕘᕋᖃᑦᑕᑦᑕᐃᓐᓇᕐᓃᑦ ᐊᒃᓱᕈᕐᓇᖅᑐᒃᑰᕐᓂᕐᓘᓐᓃᑦ, ᐊᑲᐅᙱᓕᐅᕈᑏᑦ ᐃᖅᑲᓇᐃᔭᕐᕕᖕᒥᑦ, ᐊᒻᒪᓗ ᐃᖅᑲᓇᐃᔭᕐᓂᖅ ᐃᓄᖃᙱᓗᐊᖅᑐᒥᑦ. ᐃᓱᒪᓕᕆᓂᕐᒧᑦ ᐋᓐᓂᕐᓃᑦ ᓲᕐᓗ ᖁᐊᖅᓵᕐᓇᖅᑐᒃᑰᓚᐅᕐᓗᓂ ᐊᒃᓱᕈᕐᓇᖅᑐᖅᓯᐅᕈᑎᖃᓕᕐᓗᓂ, ᐱᕙᓪᓕᐊᔪᓐᓇᖅᑐᑦ ᓴᖅᑭᓪᓗᓂᓗ ᑎᒥᒧᑦ ᐋᓐᓂᕐᓂᐅᓕᕐᓗᓂ.
ᑲᒪᒋᓇᓱᐊᕐᓗᒍ ᑕᒪᓐᓇ ᑎᑭᐅᒪᔾᔪᑕᐅᒐᔪᙱᑦᑐᖅ ᑕᐃᑲᓂ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ (OHS) ᐱᓕᕆᐊᒃᓴᐅᔪᓂᑦ, ᑖᒃᑯᐊ ᑲᓇᑕᒥ ᒪᓕᒃᑕᐅᔭᕆᐊᓖᑦ ᑲᑐᔾᔨᖃᑎᒌᖏᑦ (CSA) ᐱᕙᓪᓕᐊᑎᑦᑎᓯᒪᔪᑦ ᑲᓇᑕᓗᒃᑖᒧᑦ ᒪᓕᒃᑕᐅᔭᕆᐊᓕᖕᓂᒃ ᑕᒪᑐᒧᖓ ᐃᓱᒪᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᑦ ᐃᖅᑲᓇᐃᔭᕐᕕᖕᓂᑦ ᑲᓇᑕᓗᒃᑖᒥᑦ [ᑲᓇᑕᓗᒃᑖᒥᑦ ᒪᓕᒃᑕᐅᔭᕆᐊᓖᑦ ᑲᓇᑕᒥ ᑕᒪᒃᑯᓄᖓ ᐃᓱᒪᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᖅᑲᓇᐃᔭᕐᕕᖕᒥᑦ (ᑲᓇᑕᒥ ᒪᓕᒃᑕᐅᔭᕆᐊᓖᑦ ᑲᑐᔾᔨᖃᑎᒌᖏᑦ ᒪᓕᒃᑕᐅᔭᕆᐊᓖᑦ (CSA Standard CAN/CSA-Z1003-13/BNQ 9700-803/2013)].
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᐱᕙᓪᓕᐊᑎᑦᑎᓯᒪᔪᑦ ᐃᖅᑲᓇᐃᔭᖅᑏᑦ ᖃᐅᔨᒪᔾᔪᑎᒃᓴᖏᓐᓂᒃ ᑕᒪᑐᒧᖓ ᐃᓱᒪᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᓂᕐᒧᑦ ᐃᖅᑲᓇᐃᔭᕐᕕᖕᒥᑦ ᐃᑲᔪᖅᓯᖁᓪᓗᒋᑦ ᐃᖅᑲᓇᐃᔭᕐᕕᖕᓂᑦ ᓄᓇᕘᒥᑦ ᐊᒻᒪᓗ ᓄᓇᑦᓯᐊᒥᑦ ᐊᑐᓕᖅᑎᑦᑎᕙᓪᓕᐊᑎᓪᓗᒋᑦ ᑲᓇᑕᓗᒃᑖᒥᑦ ᒪᓕᒃᑕᐅᔭᕆᐊᓕᖕᒥᒃ.
