ᑭᕕᒃᓯᓂᖅ, ᐊᑦᑎᖕᓂᓴᒧᑦ ᐃᓕᓯᓂᐊᕐᓗᑎᑦ, ᐊᒻᒪᓗ ᐱᓕᕆᐊᕆᓪᓗᒋᑦ ᓂᐅᕋᐃᓗᑎᑦ ᐳᐃᒍᓲᕆᔭᕗᑦ ᓴᓇᓪᓗᓂ ᐊᑐᕆᐊᓕᑦ ᐅᑯᐊᓗ ᐋᓐᓂᕈᑕᐅᒐᔪᖕᓂᖅᐹᑦ ᓴᓇᕕᖕᒥ. ᖃᐅᑕᒫᑦ ᑕᐃᒪᓐᓇᐃᓕᐅᖅᐸᓐᖏᒃᑲᓗᐊᕈᕕᑦ, ᑭᕕᒃᓯᓚᐅᖅᓯᒪᔪᒃᓴᐅᕗᑎᑦ ᐅᖁᒪᐃᑦᑐᓂᒃ ᓴᓇᕕᖕᓂ. ᐅᔾᔨᕆᔭᒃᓴᕆᓂᓐᖏᑕᐃᑦ ᖃᓄᖅ ᐋᓐᓂᕈᑎᒋᓇᔭᕐᒪᖔᕐᓂᒃ ᐃᓕᖕᓄᑦ.
ᐅᓯᓕᖅᓱᐃᑦᑎᐊᓐᖏᓂᖅ ᐃᓱᒫᓘᑕᐅᔪᖅ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ. ᐊᓂᒍᖅᑐᓂ ᑕᓪᓕᒪᑦ ᐊᕐᕌᒍᓂ, ᐅᖓᑖᓂ 12% ᓄᖃᖓᕕᖃᓚᐅᖅᑐᑦ ᐋᓐᓂᕋᒥᒃ ᑕᐃᑲᓂ ᐅᓯᓕᖅᓱᐃᓪᓗᑎᒃ. ᐅᖓᑖᓂ 40% ᑖᒃᑯᐊ ᐋᓐᓂᕐᓂᐅᔪᑦ ᑐᓄᒥᒍᑦ ᕿᑎᕐᒥᒍᑦ.
ᐱᓕᕆᐊᖃᖃᑦᑕᕐᒪᑕ ᐅᓯᓕᖅᓱᐃᓪᓗᑎᒃ ᐅᖓᑖᓄᑦ 20 ᑭᓚᒍᓛᒻᔅ ᐅᖁᒪᐃᓐᓂᓕᖕᓕᒃ (44.1 ᐸᐅᓐᔅ) ᐋᓐᓂᕈᑎᒃᓴᖃᕐᓂᖓ ᐊᖏᓂᖅᓴᐅᔪᖅ. ᐅᓇ ᑐᑭᖃᖅᑐᖅ ᐅᖁᒪᐃᑦᑐᓕᕆᓂᕐᒧᑦ ᑕᐃᒪᓐᓇᐃᑦᑐᑦ. ᑭᕕᒃᓯᖃᑦᑕᕐᓂᖅ ᐊᒻᒪᓗ ᐊᒻᒧᒃᑎᑦᑎᕙᓪᓕᐊᓂᖅ ᐅᕿᑦᑐᓂᒃ ᐅᓯᓕᖅᓱᐃᓂᖅ ᑕᐃᒪᓐᓇᐃᓕᐅᑯᑖᖅᖢᓂ ᐊᑯᓂ ᐃᑲᕐᕋᓄᑦ ᑕᖃᓇᖅᑐᐋᓗᒃ, ᑕᐃᒪᓗ ᐋᓐᓂᖅᑎᑦᑎᔪᓐᓇᖅᑐᖅ.
ᖃᓄᖅ ᐋᓐᓂᖅᑕᐃᓕᒪᔪᓐᓇᖅᐲᑦ?
ᐱᔭᕐᓂᓛᖅ ᐋᓐᓂᖅᑕᐃᓕᒪᓇᓱᒃᐸᒃᖢᓂ ᐅᐊᔭᒨᖅᑐᓂᒃ ᐊᐅᓚᐅᑎᓕᖕᓂᒡᓗ ᐃᑲᔪᖅᑎᖃᕐᓗᑎᑦ, ᓲᕐᓗ ᐊᒃᓴᓗᐊᓕᑦ ᐊᔭᐅᕈᑎᑦ, ᑭᕕᒃᓯᓯᑦ, ᐃᐱᐅᑕᐃᑦ ᐊᒃᖢᓈᑦ, ᐊᒻᒪᓗ ᐊᒃᔭᖅᑑᑎᑦ ᐊᒃᓴᓗᐊᓕᑦ.
ᐸᕐᓇᐃᓯᒪᕙᒌᖅᐸᒃᓗᑎᑦ ᐊᖏᔪᓂᒃ ᐱᓕᕆᓂᐊᕈᕕᑦ ᐋᓐᓂᖅᑐᖃᕐᓂᐊᓐᖏᒻᒪᑦ ᐊᒻᒪᓗ ᐃᒡᓯᓇᖅᑕᐅᓯᒪᑯᑖᓲᖑᖕᒪᑕ ᓴᓇᔨᓂᑦ ᐊᒻᒪᓗ ᐃᖅᑲᓇᐃᔭᖅᑎᑦᑎᔨᓂᑦ. ᐃᓱᒪᒋᑦᑎᐊᕐᓗᒋᑦ ᓱᓕᔪᑦ ᑕᐃᒪᓐᓇᐅᓲᑦ:
- ᖃᓄᖅ ᐅᖁᒪᐃᑎᒋᕙ ᐅᓯᒃᓴᐃᑦ?
- ᖃᓄᐃᓕᖓᕙ ᐅᓯᒃᓴᖅ ᖃᓄᐃᓕᖓᔭᕆᐊᖃᖅᐸ ᑎᒥ? (ᖃᓂᑦᑐᒧᑦ ᐅᕝᕙᓘᓐᓃᑦ ᐅᖓᓯᒃᑐᒧᑦ? ᖁᑦᑎᒃᑐᒧᑦ ᐅᕝᕙᓘᓐᓃᑦ ᐊᑦᑎᒃᑐᒧᑦ?)
- ᖃᓄᖅ ᐅᖓᓯᒃᑎᒋᕙ ᐊᒡᔭᖅᓯᔭᕆᐊᖃᕐᓂᐊᖅᑕᐃᑦ?
- ᖃᓄᐃᓕᖃᑦᑕᕆᐊᖃᕐᓂᐊᖅᐸ ᑎᒦᑦ ᑭᕕᒃᓯᓇᓱᒃᓗᑎᑦ ᐊᒻᒪᓗ ᓅᓪᓗᒍ ᐃᓂᒃᓴᖓᓄᑦ?
- ᖃᑦᓰᖅᓱᕆᐊᖃᖅᐱᑦ ᑎᒦᑦ ᐊᑐᕆᐊᖃᖅᐱᐅᒃ ᖃᓄᖅ ᐊᑯᓂᐅᑎᒋᔪᒧᑦ? (ᑕᓪᓕᒪᐃᕐᓗᖓ ᑭᕕᒃᓯᓗᖓ ᒥᓂᑦ ᐊᓂᒍᑐᐊᕌᖓᑦ? ᐊᑕᐅᓯᐊᕐᓗᖓ ᑭᕕᒃᓯᓗᖓ 15 ᒥᓂᑦᔅ ᐊᓂᒍᑐᐊᕌᖓᑦ?)
- ᖃᓄᖅ ᐊᑯᓚᐃᑦᑕᖅᑎᒋᕙ ᐅᓯᓕᖅᓱᐃᓂᖅ ᐅᓪᓗᖅ ᐊᑕᐅᓯᕐᒥ? ᒥᑭᔫᒍᓂ ᕿᓚᒥᐅᕙᒃᓗᓂ ᐱᔭᒃᓴᑐᐃᓐᓇᐅᓗᓂ ᐅᓪᓗᒥ, ᐅᕝᕙᓘᓐᓃᑦ ᐊᒥᓱᐃᖅᓱᖃᑦᑕᖅᑐᑦ ᐅᓯᓕᖅᓱᕆᐊᓕᑦ?
ᐋᕿᒃᓱᑦᑎᐊᖅᓯᒪᒍᑎᒃ ᐃᑲᔫᑎᔪᓐᓇᖅᑐᖅᑕᐅᖅ ᐅᓄᓐᖏᓂᖅᓴᐅᓗᑎᒃ ᐋᓐᓂᕈᑕᐅᖃᑦᑕᖅᑐᓄᑦ. ᐃᓱᒪᒋᑦᑎᐊᕐᓗᒋᑦ ᐳᖅᑐᓂᖓ ᐊᒻᒪᓗ ᐃᓗᑐᑎᒋᓂᖓ ᖁᓕᕈᐊᑦ ᐊᒻᒪᓗ ᖃᓄᖅ ᐋᕿᒋᐊᕈᓐᓇᖅᐸᑦ ᑎᒥ ᐊᒃᓱᕈᖅᑎᓗᐊᖃᑦᑕᕐᓂᐊᓐᖏᒻᒪᑦ ᐱᓕᕆᓂᐊᕐᓗᒋᑦ ᐅᓯᓕᖅᓱᖃᑦᑕᕆᐊᖃᖅᑐᑦ. ᑕᐃᒪᓗ, ᐱᖁᑎᑦ ᓅᑦᑕᕆᐊᖃᕐᒪᑕ ᐊᑯᓚᐃᑦᑐᒥᒃ ᓯᕐᓗᐊᕐᒧᑦ ᐊᕙᑖᓂ ᓰᖁᑦ ᐊᒻᒪᓗ ᓴᒡᕕᒃ. ᓴᓇᔩᑦ ᑭᕕᒃᓯᖃᑦᑕᕐᓗᑎᒃ (ᓲᕐᓗ ᐃᑯᕐᕋᓂᒃ ᐅᕝᕙᓘᓐᓃᑦ ᒪᔪᕋᐅᑎᓂᒃ) ᐱᔭᕆᐊᖃᕌᖓᒥᒃ ᐱᖁᑎᓂᒃ ᐃᓂᖃᖅᑐᑦ ᐳᖅᑐᔪᓂ.
ᑭᓇ ᑲᒪᒋᔭᖃᖅᐸ?
ᐃᖅᑲᓇᐃᔭᖅᑎᑦᑎᔩᑦ ᐊᒻᒪᓗ ᓴᓇᔩᑦ ᑕᒪᕐᒥᒃ ᐱᒻᒪᕆᐅᔪᒥᒃ ᐱᔭᒃᓴᖃᖅᑐᑦ ᐊᑦᑎᒃᓯᓯᒪᑎᓪᓗᒋᑦ ᓴᓇᕕᖕᒥ ᐋᓐᓂᕈᑕᐅᖃᑦᑕᖅᑐᑦ.
ᐃᖅᑲᓇᐃᔭᖅᑎᑦᑎᔪᑦ ᐃᒪᓐᓇᐅᓗᑎᒃ:
- ᐊᑐᓕᖅᑕᐅᑎᑦᑎᓗᑎᒃ ᐊᑐᐊᒐᕐᓂᒃ ᐊᑐᖅᓯᓂᐊᕐᓗᓂᒃ ᐊᐅᓚᐅᑎᓕᖕᓂᒃ
- ᐋᕿᒃᓱᖅᓯᒪᓗᒋᑦ ᓴᓇᔪᑦ ᐃᖏᕐᕋᓂᖓ ᐃᒃᐱᒋᑦᑎᐊᕐᓗᒋᑦ ᐅᓄᖅᑐᐃᕆᐊᖃᕐᓂᖓ ᐅᓯᓕᖅᓱᕐᓗᓂ ᑭᕕᒃᓯᖃᑦᑕᕐᓗᓂ ᐅᓪᓗᒥ, ᐊᒻᒪᓗ ᑖᓐᓇ ᓴᓇᔨ ᑕᖃᐃᖅᓯᑦᑎᐊᖃᑦᑕᕐᓗᓂ ᐃᓗᐊᕆᔭᒥᒍᑦ
- ᐊᔪᕐᓇᖏᑦᑎᓪᓗᒍ, ᐅᖁᒪᐃᓗᐊᕈᓐᓃᖅᑎᓪᓗᒋᑦ ᒥᑭᑦᑑᑕᐅᓂᖅᓴᕈᖅᑎᓪᓗᒋᑦ ᐅᓄᖅᓯᑎᓪᓗᒋᑦ
- ᐱᔭᕆᐅᖅᓴᓯᒪᓗᑎᑦ ᑖᒃᑯᓂᖓ ᑭᕕᒃᓯᓂᖅ, ᐊᑦᑎᖕᓂᖅᓴᒧᑦ ᐃᓕᓯᓇᓱᒡᓗᑎᑦ, ᐊᔭᐅᒃᓯᓂᖅ, ᓄᓱᒃᓯᓂᖅ ᐱᖁᑎᓂᒃ
- ᐱᐅᓯᕚᓪᓕᖅᑎᓪᓗᒍ ᓴᓇᕕᑦ ᐃᓗᐊ ᑕᐃᒪᓗ ᓴᓇᔨᑦ ᐅᓯᓕᖅᓱᑦᑎᐊᕈᓐᓇᕐᓂᐊᕐᒪᑕ ᐅᓗᕆᐊᓇᖅᑐᖃᓐᖏᓪᓗᓂ
ᓴᓇᔨᑦ ᐃᒪᓐᓇᐅᓗᑎᒃ:
- ᓄᑭᖏᑦ ᐃᖃᐃᓕᓴᕐᓗᒋᑦ ᐅᖁᒪᐃᑦᑐᓂᒃ ᑭᕕᒃᓯᓂᐊᓵᕐᓗᑎᒃ
- ᓈᒻᒪᒋᔭᒃᑯᑦ ᑕᖃᐃᖅᓯᖃᑦᑕᕐᓗᑎᑦ, ᐊᒻᒪᓗ ᑕᐃᑲᓂ ᐃᖃᐃᓕᓴᕐᓗᒋᑦ ᓄᑭᒃᓴᕐᓗᑎᑦ
- ᐅᖁᒪᐃᑦᑐᓂᒃ ᑭᕕᒃᓯᑦᑕᐃᓕᒪᕙᒡᓗᑎᑦ ᓂᐊᖁᕐᐱᑦ ᖁᓛᒍᑦ
- ᕿᑏᑦ ᑐᓄᐃᑦ ᑐᑭᓕᐊᖅᑎᓪᓗᒍ ᐊᒻᒪᓗ ᓂᐅᒃᑭᒃ ᐃᕿᑎᓪᓗᒋᑦ ᖁᕕᒃᓯᓇᓱᔨᓗᑎᑦ ᐅᕝᕙᓘᓐᓃᑦ ᐃᓕᓯᓇᓱᒃᓗᑎᑦ ᐊᑦᑎᒃᑐᒧᑦ
- ᑎᒦᑦ ᕿᐱᑎᑦᑕᐃᓕᒪᒋᐊᖅᐸᒃᓗᒍ ᑭᕕᒃᓯᑎᓪᓗᑎᑦ
- ᐅᓯᓕᐅᑎᓇᓱᒃᑕᐃᑦ ᑎᒥᖕᓄᑦ ᐊᒃᑐᑦᑎᐊᕐᓗᒍ
- ᑭᕕᒃᓯᖃᑦᑕᕐᓗᑎᑦ ᓴᓇᖃᑎᒋᔭᑎᑦ ᐃᑲᔪᖅᑎᒋᓗᒋᑦ ᑕᐃᒪᓐᓇᐅᔭᕆᐊᖃᕈᕕᑦ
ᐃᑲᔪᕈᑎᒃᓴᐃᑦ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᑦ ᑐᓂᓯᓯᒪᕗᑦ ᐃᓕᖕᓄᑦ ᖃᐅᔨᒪᑎᑦᑎᔾᔪᑎᒃᓴᓂᒃ ᐱᔾᔪᑎᒋᓪᓗᒋᑦ ᖃᓄᖅ ᖃᒪᒋᔭᕆᐊᖃᕐᓂᖏᑦ ᐅᓯᓕᖅᓱᐃᓗᓂ:
- ᐊᑐᖅᐸᓐᖏᒃᑯᖕᓂ ᐊᑦᑕᕐᓇᖅᑐᒦᑕᐃᓕᑎᑦᑎᔾᔪᑎᑦ ᐊᑐᕆᐊᓕᑦ, ᑕᐃᒪᓗ ᐋᓐᓂᕈᓐᓇᖅᑕᐃᑦ ᑐᓄᐃᑦ ᕿᑏᑦ. ᐅᖃᓕᒫᕐᓗᒍ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᑦ ᐱᔾᔪᑎᒋᓪᓗᒍ ᑐᓄ ᕿᑎᖅ ᐋᓐᓂᖅᑎᓪᓗᒍ ᐃᓕᑦᑎᓗᑎᑦ ᖃᓄᖅ ᑕᐃᒪᓐᓇᐅᓐᖏᑦᑐᓐᓇᕐᓂᐊᕋᕕᑦ.
- ᕿᐱᑎᓯᒪᑦᑕᐃᓕᓗᒍ ᑎᒦᑦ ᐊᒃᓱᕈᖅᑎᓪᓗᑎᑦ ᑭᕕᒃᓯᓇᓱᒃᖢᑎᑦ ᐅᖁᒪᐃᑦᑐᓂᒃ. ᑭᕕᒃᓯᓂ ᖁᐊᕐᓵᕐᓇᙱᑦᑐᒥᒃ ᐃᖅᑲᓇᐃᔭᖅᕕᒃᒥᓐ ᑕᑯᑎᑦᑎᔪᖅ ᖃᓄᖅ ᐋᓐᓂᓐᖏᔾᔪᑎᒋᔪᓐᓇᖅᑕᕐᓂᒃ ᐊᑐᕐᓗᒋᑦ.
ᖃᓄᖅ ᐅᖁᒪᐃᑎᒋᔪᓂᒃ ᐃᖅᑲᓇᐃᔭᖅᑎᒋᔭᑎᑦ ᑭᕕᒃᓯᔭᕆᐊᖃᖅᑎᑉᐱᒋᑦ ᐃᑲᔪᖅᑕᐅᓐᖏᓪᓗᑎᒃ ᑭᓱᑐᐃᓐᓇᓄᑦ? ᖃᐅᔨᒪᕕᑦ ᖃᓄᖅ ᐊᑯᓚᐃᑎᒋᔪᒥᒃ ᐱᓕᕆᔪᓐᓇᕐᒪᖔᑕ ᐅᓯᓕᖅᓱᐃᓗᑎᒃ? WorkSafe BC (ᐃᖅᑲᓇᐃᔭᖅᑎᑦ ᐊᑦᑕᕐᓇᖅᑐᒦᑕᐃᓕᑎᑦᑎᔨᑦ ᐳᑎᓯ ᑲᓚᑉᐱᐊᒥ) ᒪᕐᕉᖕᓂᒃ ᓈᓴᐃᔾᔪᑎᖃᖅᑐᑦ ᐃᑲᔫᑎᓂᐊᖅᑐᓂᒃ ᑭᐅᓂᐊᕐᓗᒋᑦ ᑖᒃᑯᓄᖓ ᐊᐱᖁᑎᓂᒃ:
ᑲᓇᑕᒥ ᐱᓕᕆᕝᕕᒃ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᐃᑲᔫᑎᔪᓂᒃᑕᐅᖅ ᐱᖃᖅᑐᑦ ᐱᔾᔪᑎᒋᓪᓗᒋᑦ ᐃᖅᑲᓇᐃᔭᕐᕕᒃ ᐋᕿᑦᑎᐊᖅᓯᒪᓗᓂ ᐊᒻᒪᓗ ᐃᓕᓐᓂᐊᕈᑎᑦ ᐱᖁᑎᓂᒃ ᖃᓄᖅ ᐊᑐᖅᑕᐅᓲᖑᖕᒪᖔᑕ.