ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᑭᑦᓄᓇ ᐱᓕᕆᐊᒃᓴᓄᑦ ᐃᖕᒃ ᐊᒻᒪ ᐱᐅᓛᒧᑦ ᓂᕈᐊᖅᓯᓂᕐᒧᑦ ᓇᑉᐸᖅᑎᕆᓂᖅ (RB) ᓕᒥᑎᑦ ᐸᓯᔭᐅᕗᑦ ᓱᕋᐃᓂᐅᔪᓄᑦ ᐅᕘᓇ ᓄᓇᕗᒻᒥ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᒧᑦ

ᒫᑦᓯ 20 / 2018

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᑭᑦᓄᓇ ᐱᓕᕆᐊᒃᓴᓄᑦ ᐃᖕᒃ ᐊᒻᒪ ᐱᐅᓛᒧᑦ ᓂᕈᐊᖅᓯᓂᕐᒧᑦ ᓇᑉᐸᖅᑎᕆᓂᖅ (RB) ᓕᒥᑎᑦ ᐸᓯᔭᐅᕗᑦ ᓱᕋᐃᓂᐅᔪᓄᑦ ᐅᕘᓇ ᓄᓇᕗᒻᒥ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᒧᑦ

ᐃᖃᓗᐃᑦ, ᓄᓇᕗᑦ (ᒫᔾᔨ 20, 2018) – ᒫᔾᔨ 13, 2018−ᒥ, ᑭᑦᓄᓇ ᐱᓕᕆᐊᒃᓴᓄᑦ ᐃᖕᒃ (“Kitnuna Projects”) ᐊᒻᒪ ᐱᐅᓛᒧᑦ ᓂᕈᐊᖅᓯᓂᕐᒧᑦ ᓇᑉᐸᖅᑎᕆᓂᖅ (RB) ᓕᒥᑎᑦ (“Best Choice Construction”) ᓴᖅᑭᓚᐅᖅᐳᑦ ᓄᓇᕗᒻᒥ ᐃᖅᑲᖅᑐᐃᕕᖓᓐᓂ ᒪᓕᒐᕆᔨᒃᑯᓐᓄᑦ ᐃᖃᓗᖕᓂ ᐊᒻᒪ ᐊᑐᓂ ᐸᓯᔭᐅᕗᑦ ᓱᕋᐃᓂᐅᔪᓄᑦ ᐅᕘᓇ ᓄᓇᕗᒻᒥ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒐᕐᒧᑦ.

ᑭᑦᓄᓇ ᐱᓕᕆᐊᒃᓴᑦ ᐸᓯᔭᒃᓴᐅᓂᕋᓚᐅᖅᐳᑦ ᐱᓕᕆᑦᑎᐊᙱᓐᓂᖏᓐᓄᑦ ᑕᒪᒃᑭᓂ ᓈᒻᒪᒃᑐᓂ ᐅᔾᔨᖅᓱᑦᑎᐊᕐᓂᐅᔪᓂ ᐊᒻᒪᓗ ᐱᓕᕆᓗᑎᒃ ᑕᒪᕐᒥᒃ ᓈᒻᒪᒃᑐᓂ ᐱᓕᕆᓂᐅᔪᓂᑦ ᓇᓗᓇᐃᖅᓯᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐊᒻᒪᓗ ᐊᑦᑕᓇᔾᔭᐃᖅᓯᒪᓂᕐᒧᑦ ᑕᒪᕐᒥᒃ ᐃᓄᖕᓄᑦ ᐱᓕᕆᕝᕕᐅᔪᒥ. ᐱᐅᓛᒧᑦ ᓂᕈᐊᖅᓯᓂᕐᒧᑦ ᓇᑉᐸᖅᑎᕆᓂᖅ ᐸᓯᔭᒃᓴᐅᓂᕋᓚᐅᖅᐳᑦ ᐅᖃᐅᔾᔨᓯᒪᑦᑎᐊᙱᓐᓂᖏᓐᓂ ᓈᒻᒪᒃᑐᒥ ᐊᑐᓂ ᐃᖅᑲᓇᐃᔭᖅᑎᓂᑦ ᐊᑦᑕᓇᖏᑦᑐᒥᑦ ᐃᖅᑲᓇᐃᔭᕈᓐᓇᖁᓪᓗᒋᑦ.

ᓄᓇᕗᒻᒥ ᐃᖅᑲᖅᑐᐃᔨᒃᑯᑦ ᓈᒻᒪᒃᓴᓚᐅᖅᐳᑦ ᐸᓯᔭᒃᓴᐅᓂᖏᓐᓄᑦ ᐊᒻᒪ ᐃᓕᓯᓪᓗᑎᒃ ᐃᖅᑲᖅᑐᖅᑕᐅᓪᓗᑎᒃ ᐊᑐᓂ ᑲᒻᐸᓂᐅᔪᑦ. ᑭᑦᓄᓇ ᐱᓕᕆᐊᒃᓴᑦ ᐃᖅᑲᖅᑐᖅᑕᐅᓚᐅᖅᐳᑦ ᐊᑭᓕᐅᑎᕆᔭᒋᐊᓕᖕᒥᒃ $52,173.91−ᒥ ᐊᒻᒪ ᐱᕋᔭᖕᓂᒃᑯᑦ ᐋᓐᓂᖅᑕᐅᓯᒪᔪᓄᑦ ᐊᑭᓕᐅᑎᒃᓴᒃᑲᓐᓂᕐᒥᑦ $7,826.09−ᒥ. ᐱᐅᓛᒧᑦ ᓂᕈᐊᖅᓯᓂᕐᒧᑦ ᓇᑉᐸᖅᑎᕆᓂᕐᒧᑦ ᐃᖅᑲᖅᑐᖅᑕᐅᓚᐅᖅᐳᑦ ᐊᑭᓕᐅᑎᕆᔭᒋᐊᓕᖕᒥᒃ $15,000−ᒥ ᐊᒻᒪ ᐱᕋᔭᖕᓂᒃᑯᑦ ᐋᓐᓂᖅᑕᐅᓯᒪᔪᓄᑦ ᐊᑭᓕᐅᑎᒃᓴᒃᑲᓐᓂᕐᒥᑦ $1,000−ᒥ. ᐊᒥᐊᒃᑯᖏᑦ ᐃᖅᑲᖅᑐᒐᒃᓴᐅᔪᑦ ᑭᑦᓄᓇ ᐱᓕᕆᐊᒃᓴᓄᑦ ᐊᒻᒪ ᐱᐅᓛᒧᑦ ᓂᕈᐊᖅᓯᓂᕐᒧᑦ ᓇᑉᐸᖅᑎᕆᓂᕐᒧᑦ ᐲᖅᑕᐅᓚᐅᖅᐳᑦ, ᐊᒻᒪᓗᑦᑕᐅᖅ ᐃᖅᑲᖅᑐᒐᒃᓴᐅᓂᐅᓚᐅᖅᑐᑦ ᐊᓯᖓᓄᑦ ᐸᓯᔭᒃᓴᐅᓚᐅᖅᑐᒧᑦ.

ᐸᓯᔭᐅᓯᒪᔪᖅ ᖃᓄᐃᓐᓂᐅᓚᐅᖅᑐᒥᑦ ᐋᒍᔅᑎ 18, 2015−ᒥ ᐃᖅᑲᓇᐃᔭᖅᑎᐅᔪᖅ ᐃᖅᑲᓇᐃᔭᖅᑎᒋᔭᐅᔪᖅ ᐱᐅᓛᒥ ᓂᕈᐊᕐᓂᕐᒧᑦ ᓇᑉᐸᖅᑎᕆᓂᕐᒧᑦ ᐋᓐᓂᓚᐅᖅᑎᓪᓗᒍ ᐱᓕᕆᑎᓪᓗᒍ ᑲᓇᑕᒥ ᖁᑦᑎᒃᑐᒥ ᐅᑭᐅᖅᑕᖅᑐᒥ ᖃᐅᔨᓴᕐᕕᖓᓐᓂ (CHARS) ᐃᓂᒋᔭᖓᓐᓂ ᐃᖃᓗᒃᑑᑦᑎᐊᖅ, ᓄᓇᕗᒻᒥ.

“ᐃᖅᑲᓇᐃᔭᕐᕕᖕᒥ ᖃᓄᐃᓐᓂᐅᔪᑦ ᐱᑎᑦᑕᐃᓕᒪᑎᑕᒃᓴᐅᓲᖑᕗᑦ ᖃᖓᓕᒫᖅ. ᐃᖅᑲᓇᐃᔭᖅᑎᖁᑎᓕᑦ ᐱᓕᒻᒪᒃᓴᐃᔭᕆᐊᖃᖅᐳᑦ ᐃᖅᑲᓇᐃᔭᖅᑎᓂᑦ ᐊᒻᒪᓗ ᓇᓗᓇᐃᖅᓯᓗᑎᒃ ᐱᑕᖃᑐᐃᓐᓇᕆᐊᓕᖕᓂ ᐊᑦᑕᕆᔭᐅᔪᓂᑦ ᓇᓗᓇᐃᖅᓯᓂᕐᒧᑦ ᐊᑦᑕᓇᙱᑦᑐᒥ ᐃᖅᑲᓇᐃᔭᕐᕕᖕᒥᑦ ᑕᒪᒃᑭᓄᑦ”, ᐅᖃᓚᐅᖅᐳᖅ ᑕᐃᕝ ᒍᕋᓐᑎ, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᖓᔪᖅᑳᖅ ᐊᒻᒪᓗ ᑎᑎᕋᕐᕕᖕᒥ ᐊᖓᔪᖅᑳᖓ. “ᑕᒪᕐᒥᒃ ᓴᓇᔩᑦ − ᓄᑖᖑᒐᓗᐊᖅᐸᑕ, ᒪᒃᑯᒃᑐᑦ ᐅᑎᖅᐸᓪᓕᐊᔪᓄᓪᓗ − ᑕᒪᒃᑭᐅᒪᔪᒥ ᐱᓕᒻᒪᒃᓴᖅᑕᐅᔭᕆᐊᖃᖅᐳᑦ ᐊᑦᑕᓇᖅᑐᖃᙱᑦᑐᒥᒃ ᐱᓕᕆᕝᕕᒃᑯᑦ ᖃᓄᐃᓕᐅᕈᑎᓂᑦ ᐊᒻᒪᓗ ᖃᓄᖅ ᐊᑦᑕᓇᙱᑦᑐᒥ ᐊᐅᓚᑦᑎᓂᕐᒧᑦ ᐱᓕᕆᔾᔪᑎᖏᓐᓂ ᐊᒻᒪᓗ ᐊᐅᓚᐅᑎᓕᖕᓂᑦ ᐃᖅᑲᓇᐃᔭᓕᓚᐅᙱᓐᖓᓐᓂ. ᐱᓕᕆᔨᐅᔪᖅ ᓇᓗᒐᓚᑐᐊᖅᐸᑦ, ᐱᔪᓐᓇᕐᓂᕆᕙᖓᑦ ᐋᒃᑳᕈᓐᓇᖃᑦᑕᖁᓪᓗᒋᑦ ᐊᑦᑕᓇᖅᑐᓕᖕᓂᒃ ᐱᓕᕆᐊᓂᒃ.”

ᐅᐸᒡᓗᒍ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖓᓐᓂ ᖃᐅᔨᒋᐊᒃᑲᓐᓂᕐᓂᕐᒧᑦ ᐃᖅᑲᓇᐃᔭᖅᑎᖁᑎᓕᖕᓄᑦ ᐱᔪᓐᓇᐅᑎᖏᑦ ᐊᒻᒪᓗ ᐱᓕᕆᐊᒃᓴᖏᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᐊᒻᒪᓗ ᐱᓕᕆᐊᒃᓴᖏᓐᓄᑦ.

-30-

ᔮᑭᓖᓐ ᒨ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᕐᒧᑦ
ᐅᖄᓚᐅᑦ: (867) 920-3829
ᐊᑭᖃᙱᑦᑐᖅ: 1 (800) 661-0792 ᐅᖃᓘᑎᖓᓄᑦ 3829